Sinnattora......
Sinnatoqarpunga. Kalaallit Nunaannut tunngasumik, pisuussuteqartumik. Pilluarneq pisuussutigalugu, ataatsimoorneq pisuussutigalugu, periarfissat pisuussutigalugit aamma unamminartut pisuussutigalugit. Inuiaqatigiit kikkut TAMARMIK periarfissaqarfigisaat PISINNAASAMINNIK atuiffigisinnaasaat apeqqutaatinnagit oqaatsit, sumi inunnngorsimaneq, inuttut tunngavigisat, suiaassuseq imaluunniit qassinik ukioqarneq. Inuiaqatigiit inunnik immikkoortitsinngitsut tamaani kikkut tamarmik ataatsimoornermut PISUSSAAFFEQARLUTIK, tassani inuit ataasiakkaat namminneq akisussaassuseqartutut misigalutik nunatta ineriartornissaanut pitsaasumik tapertaasinnaallutik. Anguneqarsinnaanngitsoq uanga nassuiaatiginerpara?
Naamik kisianni takorluugaavoq sulerulunnissamik, politikikkut sapiitsuunermik piumasaqaateqarfiusoq pisussaaffittalimmik politikkikkut assigiinngissutit aamma isummat apeqqutaatinnagit imminut qanillattornissamut. Toqqaanissamut sapiissuseqarnermik minnerunngitsumillu atorsinnaanngisanut naaggaarnermik.

Iliuuserisat inuiaqatigiinni akornanni tamani tulleriiaarnissaannut piginnaasaqarneq siunissami piginnaasat pingaarnersarisariaqarpaat, takorluugaq uanga aallarniutigisara piviusunngortissinnaassagutsigu.
Illit uangalu toqqaasariaqarpugut aqqutikkut sorlikkut ingerlassanerluta – tamanna annertoorujussuarmik tulleriiaarinissamik piumasaqaateqarfiuvoq. Uanga nammineq inuttut salliutissagaluarpara imminut annertunerusumik piumaffiginissaq aamma uanga avatangiisinnut, tassa uanga toqqagassatut siullertut. Inuit ataasiakkaat sulinerannut piumasaqarneq. Ingammik uagutsinnut iluatsittumik tunngaveqartunut tassaasunut inuuniarnermi aamma ilinniagaqarnermi ajunngitsumik inissisimasuusunut. Tueqarnerusut annertunerusumik nammaaqassapput. Uannut immikkoortumik pisussaaffiuvoq piginnaasat aamma periarfissat pigalugit inuiaqatigiit ineriartornissaannut sunniuteqarnissamut. Taavami uanga nammineq qanoq iliorniarpunga, immaqa aperissaatit? 

Uanga annertuumik sulissutiginiarpara arlaanni iliuuseqarsinnaaguma aamma aalajangiisartut allat sunnerniarlugit sammisani uanga nammineerlunga aalajangiiffigisinnaanngisanni.
Suliassama ilagivaat attaveqaqatigiinnissamut periarfissat ajornannginnerusut aamma akikinnerusut TELE-POST-imi suliffeqarnera aqqutigalugu. Uanga peqataaffiginiarpara akigitinneqartut appartinneqarnissaat aamma internetimut, mobilimut periarfissat ajornannginninngortillugit aamma tamatuma kingunerisaanik inuiaqatigiinni aamma avatitsinniittunik oqaloqatigiinneq ajornannginninngortillugit. Tamakku saniatigut inuusuttut aallartitsinissamut kajumissuseqartut ikiorniarpakka (maannakkut arnat inuusunnerusut ataatsimoortut marluk ingerlappakka), taakku takorluugaat piviusunngortinniarlugit, aamma uanga inuussutissarsiutinik ingerlatsisunut / kajumissuseqartunut allanut suli sungiusaasuunera ingerlatiinnarniarpara.
Uanga suliffiga aqqutigalugu CSR-imik suliaqarnermi aamma CSR Greenlandimi, aallarneeqataaffigisimasannut, suli peqataaniarpunga. Kiisalu inuiaqatigiinni oqallinnermut piviusumik peqataaniarpunga, ilaatigut Facebookimi, innuttaasunik ataatsimiititsitsinerni, ilinniakkanik ingerlatsivinnik ataatsimeeqateqartarnikkut, atuartartut allagaasigut aamma minnerunngitsumik inuit ulluinnarni naapittakkama oqaloqatigisarnerisigut.

Nuannersumik oqaluttuassaqarpit illit iluatsitumik pisimaninnut tunngasumik? Taava oqaluttuat nuannersut allanut ingerlateqqissinnaavagut, immaqa isumassarsisinnaapput ullumikkornit annertunerusumik iliuuseqalernissaminnut?

Uanga oqaluttuaq ilanngussinnaasara arnanut inuusuttunut aallarniiniartunut tunngavoq, aallarniutaavoq uannut attaveqarnerat sulinerminni toqqammavissartik takutinniarlugu. Sivikitsumik imminut ilisaritinnertut aallarnertoq suli isumassarsiaannaasuulluni, taava uteriillutik toqqammavissartik sulissutigaat ingerlaavartumik uannukaqqittarlutik isumasiorniarlunga.
Tamatuma ingerlanerani taakku inunnut isumalluutaasinnaasunut arlaqartunut Kalaallit Nunaanni aamma avataani ilisaritissimavakka, taamaallillutik isumassarsiartik ingerlateqqissinnaalersimavaat. Kiisalu qaammat ataasiunngitsoq qaangiuttoq qulakkeerpaat aningaasaliissuteqartussaq siulleq. Taava maannakkut alloriaqqissinnaalerput aallarniiniartartutut takorloorsimasartik piviusunngortissinnaalerlugu. Inuusuttut taakkut piumassuseqarput, sapiissuseqarput aamma sulerusussuseqarput, tamannalu assorsuaq isumassarsinarpoq – uangalu tunniussara tassaaginnarpoq piffissaq atorsimasara. Kisianni ilaanneeriarluni piffissaq inunnut allanut allannguutaasarpoq.