Iluliaq ataatsimoorussarput aakkiartorpoq #vision # forandringer

ILULIAQ ATAATSIMOORUSSARPUT AAKKIARTORPOQ 

Ullutsinni inuiaqatigiit aaqqissuussaanerat unamminartoqaqaaq. Aningaasaqarniarnerput neriulluarnarpallaanngilaq qallunaat nunaanniillu tapiissutit (nalikilliartuinnartut) aamma aalisarnikkut avammut tunisatigut isertittakkat pinngitsoorsinnaanngilagut. Tunisassiorsinnaassutsitsinnullu sanilliullugu (aningaasarsiallu qaffasissusaannut) ilinniarsimassuserput appaseqaaq, tamannalu nutaanik tunisassiulersinnaanermut aallartitsiniarnermut ajoqutaavoq, nunanut allanut unammillersinnaannginnatta. Qanormiuna iliortugut? Aap, aningaasaatitta qanoq atornissaat oqallisigiuarparput, inuiaqatigiinni NUTAANIK aningaasarsiorfissarsiorneq pinagu. Politikkikkullu piffissamut ungasissumut aaqqissuulluakkamik suliniuteqarnissaq isumaqatigiissutigineqarsinnaanngilaq, paarlattuanilli tusanngunartumik ajoqusersuunneq ingerlanneqarluni. 

Qanormi ILIORSINNAAVUGUT?

Inuiaqatigiinni, uungaralaannguaannaq isiginani SIUNISSARLI UNGASINNERUSOQ eqqarsaatigalugu, aaqqissuussaanerup allanngortinneqarnissaanut naalakkersuinikkut suleqatigiinneq siamasissoq aammalu suleqatigiinneq nukittooq anguniartariaqarparput, ukiunimi kingullerni politikerit tamanna pikkoriffigisimanngilaat!

Uanga paasinnittaasera malillugu suleqatigiissitaliaasup siusinnerusukkut tikkuariigaatut tamaviaarluta ilungersorlutalu ingerlaniartariaqarpugut. SIUNERTAQARTUMIK ilinniartitaaneq kisiat pinagu aammali ilinniartitaanerit pitsaassusaat piumasaqaatillu suli qaffasinnerulernissaat eqqarsaatigalugu - meeqqat atuarfianniit aallartilluta. Isumaga malillugu ilinniartitsisunut ataasiakkaanut piumasaqaatinik allaalluinnartunik nalilersorneqarsinnaasunillu piumasaqaateqalernissaq pisariaqarpoq - aammalu atuarfiit pisortaanut ataasiakkaanut tigussaasunik piumasaqaateqarneq. Innersuussutigerusunnarporluunniimmi Kalaallit Nunaanni atuarfinni pisortat pinngitsoqaratik pisortatut pikkorissartinneqarnissaat, pisortaareersut ingerlalluartut pikkorissaasutut atorlugit.  

Tassungalu ilanngullugu aamma suliffinnik aallartitsisartut atorneqarsinnaanerisa annertuumik ineriartortinnissaat anguniarneqassaaq. Taava inuusuttut suliffinnik aallartitsinissamut piumassusillit sakkussanik tigussaasunik tunineqarlutik aallartilluarnissamut kajuminnerulissapput. Soorlu Islandimisut, tassanimi suliffinnik aallartitsisarneq aamma kulturiannut ilaavoq.

Sunaluunniit pinngorfeqartarpoq, tassungalu atatillugu ataatsimut periusissatut aalajangiussaq iluatsinngitsoorsimavoq, immaqa siamasissumik tunngaveqarluni suliaanngimmat. Uanga pingaartitarilluinnarpara pisortaqarfiit (ima paasillugu Namminersorlutik Oqartussat aamma Kommunit), ilinniartitaanermik ingerlatsiviit aamma inuussutissarsiornermik ingerlataqartut akornanni SIAMASISSUMIK suleqatigiittoqarnissaa. Suliniutit aalajangersimasut anguniagaqarfiusut, inuussutissarsiornermik ingerlatsisut pisariaqartitaannik neqeroorutigisinnaasaannilluunniit tunngaveqartut - inuiaqatigiillu siunissamut ungasinnerusumut pisariaqartitaannut naleqqussakkat. Maannakkorpiaq inuusuttut ilinniagaqartut naammassisartut amerlaqaat, sumulli atussavagut? Kalaallit Nunaanni ilinniakkat qaffasinnerit pisortaqarfinni atorfeqartussanut naatsorsuussaapput, taakku suli suliffeqarfiummata anginerpaat. Tamannali pitsaasuunngilaq, piffissammi ingerlanerani pisortat suliffeqarfiini sulisunik ikilisaanissaq pisariaqalissaaq - suliffeqarfinnilu namminersortuni suliffinnik amerlanernik siunissamut ungasissumut atuuttussamik ineriartortitsinissaq pilersinneqartariaqalerpoq. 

Illit qanoq isumaqarpit? Isumaga ersarippa - immaqaluunniit suli iliuusaasinnaasunut siunnersuutit ersarinnerusut amigaatigaagit? Nammineq aamma siunnersuuteqarsinnaavutit.  

image.jpg